خـۈاطِـر عـالـيـة

  لما تعبت من فترة ودخلت المستشفى كنت بمر بحالة نفسية وعصبية لا يعلم صعوبتها إلا الله كل الناس استغربوني.. أنت قوية إزاي تنهاري كدة وطبعا إيلي مايعرفونيش فكّروا إني في حالة جزع وإزاي مش متقبلة المرض واختبار ربنا لما شوفت الفيديو دا.. اتأكدت إن الموضوع كان صعب فعلا ومالوش علاقة خالص بمقدار تدينك وعلمك الديني والمليون درس إيلي سمعتهم عن الصبر والاحتساب والتسليم لمقادير ربنا والله مؤمنين وصابرين وراضين.. بس فيه قلب مفطور من العياط وهيموت من الخوف والرعب فيه عقل مش مستوعب سقف المستشفى بدل سقف بيتي فيه تغيّر حياة كاملة .. هم مين إيلي داخلين خارجين عليّ دول! باب مش مقفول بمفتاح إزاي هقدر أنام واتطمن! حتى لو المستشفى دي الفيو بتاعها بيطل على نهر المسيسيبي هتفضل مستشفى مش هتكلم عن التعب الجسدي لأني متأقلمة جدا مع الابتلاء في الصحة والأخذ من الجسد ولله الحمد ... ولكنّ عافيتك أوسع لي https://www.youtube.com/watch?v=8NkxvRf6DOU

  هتفضل دعوتي الأبدية المفضّلة "اللهم منك العوض، وعليك العوض" أنا مهما فكّرت بعقلي مش هوصل لجمال وقدرة عوض ربنا عوض عن سنين المرض.. عوض عن سنين الحرمان.. عوض عن سنين دعوات ربنا بحكمته لم يُجيبها لي.. عوض عن كل شيء أساسي -من وجهة نظري البشرية- في الحياة ولم أحصل عليه.. عوض عن كل وفاء قدمته لحد واتقابل بالخيانة.. عوض عن كل مرة عملت في حد خير و ردّه لي بـ بشر؛ بل بـ أسوأ أنواع الشر عوض عن كل حلم طمحت له واتمنيته وماتحققش عوض عن كل مرة اتعاملت فيها بـ حُسن نيّة وحُبّ؛ واتعمل علي قصة وسيناريو وحوار، وهري، وقلنا وقالوا، وعملت وسوّت، ونصبوا لي المحاكم والمشانق حتى أحلام المنام والرؤى الحلوة.. إيلي اتمنيتها واستبشرت بيها وبرضو ماتحققتش اللهم منك العوض، وعليك العوض اللهم منك العوض، وعليك العوض اللهم منك العوض، وعليك العوض